Dita e Dëshmorëve, Kurti nderon 15 dëshmorët e Hanit të Elezit

Në shënim të 29 Gushtit, Ditës së Dëshmorëve të Hanit të Elezit, kryeministri në detyrë i  Kosovës, Albin Kurti, ka bërë homazhe në kompleksin memorial të dëshmorëve në Puset e Nikës.

Kurti ishte i shoqëruar nga ish-komandanti i UÇK-së dhe deputeti Rufki Suma, ish të burgosurit politikë Riza Xhakli dhe Valon Berisha, deputetët Jeton Raka dhe Valon Ramadani, kryetari i Qendrës së Lëvizjes Vetëvendosje, Dr. Mirsad Shkreta, si dhe kolegë e bashkëpunëtorë.

“Gjaku i dëshmorëve është në themelet e Republikës, andaj është detyrim e obligim i të gjithë neve që gëzojmë Kosovën e lirë e të pavarur ta forcojmë dhe zhvillojmë shtetin, për të cilin kanë kontribuuar dhe janë sakrifikuar breza të tërë shqiptarësh”, tha Kurti.

Ai ka përkujtuar 15 dëshmorët e kësaj komune dhe të kombit, duke shprehur nderime për luftëtarët e lirisë.

“Lavdi 15 dëshmorëve të kësaj komune dhe të kombit mbarë! Nderime luftëtarëve të lirisë!”, thuhet në mesazhin e tij.