Këshilli Shqiptaro-Amerikan shpreh shqetësim të madh për aktgjykimin e Speciales
Këshilli Shqiptaro-Amerikan për Marrëdhëniet (AARC) ka reaguar ndaj aktgjykimit të sotëm të Dhomave të Specializuara të Kosovës në Hagë, duke dënuar dënimet ndaj ish-liderëve të Ushtrisë Çlirimtare të Kosovës.
Në një deklaratë të publikuar më 16 shtator, AARC shpreh shqetësim të thellë për legjitimitetin dhe besueshmërinë e procesit gjyqësor, duke argumentuar se që nga krijimi i tij, kjo gjykatë ka trajtuar në mënyrë të përqendruar vetëm njërën palë të luftës në Kosovë.
Sipas AARC-së, “çekuilibri është i dukshëm”, pasi procedurat e kësaj gjykate kanë rezultuar me aktakuza ndaj shqiptarëve, ndërsa krimet e kryera gjatë luftës në Kosovë nuk janë trajtuar përmes një procesi të barasvlershëm gjyqësor nga ky institucion.
AARC thekson se kur një gjykatë e barazon luftën e organizuar për pavarësinë dhe çlirimin e Kosovës me një ndërmarrje kriminale, rrezikohet besimi dhe legjitimiteti i nevojshëm për një institucion gjyqësor.
Në deklaratë përmenden edhe dëshmitë e zyrtarëve të lartë amerikanë, përfshirë ish-komandantin suprem të NATO-s, gjeneralin Wesley Clark, i cili dëshmoi në mbrojtje, si dhe ambasadorin Christopher Hill dhe ish-zyrtarë të tjerë të Departamentit amerikan të Shtetit.
AARC thekson se këto dëshmi nuk përcaktojnë vetvetiu rezultatin ligjor të gjykimit, por sipas saj, tregojnë mospajtimin e thellë lidhur me karakterizimin historik dhe faktik të UÇK-së dhe konfliktit në Kosovë.
“Për AARC-në, kjo nuk është thjesht çështje mospajtimi me një aktgjykim. Është çështje drejtësie, kujtese historike dhe besueshmërie institucionale”, thuhet në deklaratë.
AARC thotë se lufta e UÇK-së kishte për qëllim çlirimin e Kosovës nga represioni dhe dhuna shtetërore serbe dhe se liderët e saj nuk duhet të vendosen në një kuadër unik ndjekjeje penale që, sipas organizatës, rrezikon ta reduktojë historinë e çlirimit të Kosovës në një narrativë të njëanshme kriminale.
Organizata shprehet gjithashtu se vendimi i sotëm do të përjetohet nga shumë shqiptarë të Kosovës si një ritraumatizim i thellë, duke rikujtuar dëbimet masive, vrasjet, persekutimin dhe shkatërrimin e shtëpive e komuniteteve gjatë luftës.
AARC u bën thirrje qytetarëve të Kosovës dhe komunitetit shqiptaro-amerikan të qëndrojnë të qetë dhe të refuzojnë çdo akt dhune apo hakmarrjeje që mund të dëmtojë institucionet demokratike të Kosovës.
Në të njëjtën kohë, AARC i bën thirrje Kuvendit të Kosovës që të shqyrtojë “menjëherë çdo mjet kushtetues dhe ligjor” për të adresuar vazhdimin e ekzistencës dhe mandatin e Dhomave të Specializuara.
Sipas AARC-së, Kuvendi duhet të ndërmarrë të gjitha masat ligjore dhe kushtetuese, përfshirë ndryshimin e nenit 162 të Kushtetutës, me qëllim shpërbërjen e Dhomave të Specializuara.
“Padrejtësi në emër të drejtësisë”, thuhet në deklaratën e AARC-së.
Organizata pranon se një veprim i tillë mund të ketë pasoja serioze diplomatike dhe ndërkombëtare, por thotë se këto pasoja duhet të peshohen përballë vazhdimit të një institucioni që, sipas saj, ka humbur besimin e një pjese të madhe të qytetarëve të Kosovës.
AARC përfundon deklaratën duke thënë se Kosova luftoi për liri, demokraci dhe sundim të ligjit dhe se drejtësia duhet të jetë e paanshme, e qëndrueshme dhe e bazuar në të gjithë historinë e konfliktit.
