Gërvalla: Nuk kam heshtur për vendimin e Hagës, jam përgatitur për betejën ligjore në fazën e ardhshme

Ministrja e Drejtësisë, Donika Gërvalla, ka thënë se nuk ka heshtur lidhur me vendimin dënues të Gjykatës Speciale në Hagë, duke theksuar se si ministre dhe bashkë me ekipin e saj është përqendruar në përgatitjet për fazat e ardhshme të procesit gjyqësor.

Duke iu përgjigjur pyetjes se pse nuk kishte reaguar publikisht për vendimin dhe për kërkesat e protestuesve për dorëheqjen e saj, Gërvalla ka mohuar kategorikisht çdo lidhje apo bashkëpunim me UNMIK-un, EULEX-in apo Gjykatën Speciale.

“Po filloj nga e fundit. Tek deklaratat që më lidhin mua në çfarëdo lloj forme me bashkëpunimin, tashmë është bërë bajate sepse i kam shpjeguar disa herë. Nuk kam në asnjë hallkë, as me UNMIK-un, as me EULEX-in, as me Gjykatën Speciale, nuk kam asnjë pikë takimi, as direkt e as indirekt. Mirëpo, edhe pak durim duhet të kemi sepse aktgjykimi do të vijë shpejt dhe do ta shohim shumë shpejt. Edhe një shpresë të vogël e kam që në fakt ata që më së shumti kanë bërtitur në këtë lëmi, ata që më së shumti më kanë etiketuar me lloj-lloj emrash, të paktën para pasqyrës të skuqen për një moment që nuk kanë dashur t’i dëgjojnë faktet, por kanë zgjedhur që të përsërisin rrenat e qitura në qarkullim nga ata vetë”, ka deklaruar ajo.

Ajo ka mohuar gjithashtu se ka heshtur për zhvillimet në Hagë. Sipas saj, përgjegjësia e saj si ministre është që të punojë në aspektin institucional dhe ligjor, ndërsa ka thënë se Qeveria tashmë ka dhënë qëndrimin e saj përmes kryeministrit.

“Ndërsa sa i përket heshtjes, unë nuk kam heshtur. Jam ministre e Drejtësisë. Kryeministri ka dhënë një deklaratë në emër të Qeverisë së Republikës së Kosovës, ndërsa unë së bashku me ekipin tim, që nga dita e parë, jam futur punës me qëllim që të përgatitemi për një betejë, sepse çështja e Gjykatës Speciale është betejë ligjore, nuk është betejë deklaratash në media. Dhe si betejë ligjore, ne duhet të jemi profesionistë, të mençur, me kokën të ftohtë, pa shumë bërtima, duhet të përgatitemi për instancën e ardhshme”, është shprehur ministrja.

Ajo ka thënë se Qeveria duhet të analizojë të gjitha rrethanat dhe të përcaktojë veprimet që mund të ndërmerren në fazat e ardhshme të procesit.

“Ju e keni dëgjuar edhe njërin prej avokatëve të katër të akuzuarve edhe tashmë të dënuarve në instancë të parë, i cili thotë që Qeveria nuk di çfarë do të ishte dashur të bëjë më shumë. Unë jam e bindur që mund të bëjmë më shumë. Mirëpo jemi duke i shikuar dhe analizuar të gjitha rrethanat me qëllim që secili në pozitën e tij, në përgjegjësinë e tij, ta kryejë punën e tij me ndershmëri dhe ashtu siç duhet”, ka thënë ajo.

E pyetur konkretisht për kërkesën e protestuesve për dorëheqjen e saj, ministrja ka thënë se një kërkesë e tillë është e drejtë e qytetarëve në një shtet demokratik.

“Është e drejtë e secilit qytetar të Republikës së Kosovës të kërkojë dorëheqjen e secilit ministër. Jetojmë në një shtet demokratik ku është e drejtë e secilit ta shprehë mendimin e tij. Prandaj nuk e komentoj unë kërkesën për dorëheqje, nuk është e imja as t’i imponoj dikujt dorëheqjen, por as t’ia ndaloj fjalën kërkujt. Është e rëndësishme që në institucionin për të cilin unë mbaj përgjegjësi, të kryhen punët ashtu si duhet edhe këto tema të diskutimeve publike të menaxhohen”, ka deklaruar ajo. /eo