Shkencëtarët britanikë po zhvillojnë vaksinë të re për Ebolën, mund të jetë gati brenda disa muajsh
Shkencëtarët në Universitetin e Oksfordit po zhvillojnë një vaksinë të re që mund të përdoret brenda pak muajsh për të ndihmuar në përballimin e emergjencës së Ebolës.
Shpërthimi, i përqendruar në Republikën Demokratike të Kongos, ka rezultuar në 750 raste të dyshuara dhe 177 vdekje.
Lloji i rrallë i Ebolës, i njohur si “Bundibugyo”, për të cilin nuk ekziston një vaksinë e provuar. Megjithatë, nuk ka garanci që vaksina do të rezultojë efektive dhe do të nevojiten kërkime te kafshët dhe prova te njerëzit për ta vërtetuar këtë, shkruan BBC, transmeton Dukagjini.
Por shkencëtarët thonë se po punojnë me urgjencë në rast se shpërthimi përhapet më shumë dhe vaksina e tyre eksperimentale bëhet e nevojshme.
Rreziku nga shpërthimi aktual i Ebolës tani është ngritur nga “i lartë” në “shumë i lartë” në Republikën Demokratike të Kongos nga Organizata Botërore e Shëndetësisë (OBSH).
Në rajonin më të gjerë, rreziku konsiderohet gjithashtu i lartë, por mbetet i ulët në nivel ndërkombëtar, shtoi organizata.
Kjo ndodh pasi OBSH shpalli të dielën një emergjencë të shëndetit publik me rëndësi ndërkombëtare, duke theksuar se shpërthimi nuk është një pandemi.
Vaksina përdor të njëjtën teknologji që ekipi zhvilloi gjatë pandemisë së Covid-19. Ajo është një teknologji shumë e përshtatshme — e njohur si ChAdOx1 — që mund të modifikohet shpejt për të vepruar kundër infeksioneve të ndryshme.
Gjatë pandemisë, vaksina u pajis me kodin gjenetik të virusit të Covid-it.
Këtë herë, ajo është përgatitur me kodin gjenetik të llojit Bundibugyo të Ebolës.
Vaksina përdor një virus të zakonshëm të ftohjes që zakonisht infekton shimpanzetë, por që është modifikuar gjenetikisht për ta bërë të sigurt për njerëzit.
Studiuesit përdorin këtë virus të modifikuar për të transportuar dhe dorëzuar material të rëndësishëm gjenetik të virusit Bundibugyo Ebola në qeliza, duke i udhëzuar ato të njohin dhe luftojnë sëmundjen e vërtetë.
Vaksina nuk shkakton infeksion apo simptoma të Ebolës, por stërvit sistemin imunitar për të ofruar mbrojtje.
