Sulm me raketa ruse në Kharkiv, të paktën dhjetë të vrarë dhe 17 të plagosur

Të paktën dhjetë persona janë vrarë dhe 17 të tjerë janë plagosur në një sulm me raketa ruse në fshatin Pechenikhi, në rajonin e Kharkivit, mëngjesin e së martës, ndërsa Rusia ka ndërmarrë një sulm të ri ajror në shkallë të gjerë ndaj Ukrainës.

Sipas kreut të administratës ushtarake të rajonit të Kharkivit, Oleh Sinyukhubov, të plagosurit janë dërguar në spital. Numri fillestar i të plagosurve ishte tetë, por më vonë u raportuan 17 të lënduar.

Sulmi shkaktoi dëme në rreth dhjetë banesa, një kafene, një zyrë postare dhe një dyqan, ndërsa të paktën shtatë automjete u dëmtuan. Ekipet e emergjencës mbërritën në vendngjarje dhe vijuan operacionet e kërkim-shpëtimit.

Presidenti ukrainas Volodymyr Zelensky reagoi ndaj sulmit vdekjeprurës, duke theksuar se raketa ruse goditi një zonë të frekuentuar, ku ndodheshin dyqane, një zyrë postare dhe banesa.

Sulmi në Pechenikhi vjen në një moment kur Rusia ka intensifikuar sulmet ajrore ndaj Ukrainës, duke goditur disa zona të vendit.