Von der Leyen reagon pas rrëzimit të dronit rus në Rumani: Kjo është luftë hibride
Presidentja e Komisionit Evropian, Ursula von der Leyen, ka reaguar pas rrëzimit të një droni rus në Rumani, duke e cilësuar incidentin si pjesë të një “lufte hibride”.
Përmes një postimi në Telegram, von der Leyen ka thënë se kërcënimet janë duke u përshkallëzuar dhe kanë për qëllim përçarjen e Bashkimit Evropian.
“Sot, Rumania shkatërroi një dron detar të ngarkuar me eksplozivë pranë platformës Neptun Deep në Detin e Zi. Një përshkallëzim i kërcënimeve është duke u zhvilluar që shqetëson qytetarët tanë dhe synon të përçajë Unionin tonë. Kjo është luftë hibride”, shkroi Presidentja e Komisionit Evropian Ursula von der Leyen në Telegram.
Von der Leyen ka shtuar se Bashkimi Evropian mbetet i gatshëm për t’iu përgjigjur çdo kërcënimi.
“Misioni themelues i Unionit tonë është të ruajë paqen. Sot, kjo do të thotë gjithashtu të kesh aftësinë për të penguar provokimin dhe agresionin. Programi ynë Gatishmëria 2030 po mobilizon deri në 800 miliardë euro. Me Iniciativën Evropiane të Mbrojtjes nga Dronët dhe Eastern Flank Watch, ne po rrisim prodhimin në Evropë për t’u ofruar Shteteve Anëtare aftësitë që u nevojiten. Në këtë mënyrë, ne mund t’u përgjigjemi kërcënimeve në zhvillim me shpejtësi, unitet dhe vendosmëri”, shtoi ajo.
