Donald Tusk lëshon alarmin e inteligjencës: Priten goditje me dronë e raketa në territorin e NATO-s

Rusia po përgatit sulme me dronë dhe raketa kundër vendeve perëndimore që mbështesin ushtarakisht Ukrainën, përfshirë territorin e Polonisë.

Paralajmërimi i ashpër u lëshua nga kryeministri polak Donald Tusk, i cili u thirr në të dhëna të siguruara nga shërbimet e inteligjencës.

Alarmi i Varshavës zyrtare vjen në një kohë kur veprimet ushtarake ruse po i afrohen gjithnjë e më shumë kufijve të aleancës së NATO-s. Gjatë javës së kaluar, një dron rus goditi një stacion vetëm disa qindra metra larg kufirit polak, në afërsi të një treni që transportonte zyrtarë të lartë perëndimorë.

Lidhur me përshkallëzimin e rrezikut gjeopolitik, Kryeministri Tusk nënvizoi se muajt e ardhshëm do të karakterizohen nga një dinamikë e lartë agresioni nga ana e Moskës, ndërsa nuk përjashtoi mundësinë e një goditjeje të drejtpërdrejtë në territorin e Polonisë:

“Në muajt e ardhshëm do të shohim veprime shumë intensive nga ana e Rusisë. Një sulm ndaj territorit polak nuk mund të përjashtohet më si skenar.”

Paralelisht me kërcënimet në kufirin polak, prapaskenat e luftës hibride ruse po zgjerohen edhe më tej në brendësi të Evropës. Së fundmi, qeveria gjermane bëri me dije se ka faktuar përgjegjësinë e Rusisë për një tentativë sulmi me dron të mbushur me lëndë eksplozive në ambientet e aeroportit të Leipzigut. /abcnews