Kansasi dërgon një demokrat në Senatin e SHBA-së për herë të parë që nga viti 1932
Demokrati Adam Hamilton fitoi një vend në Senatin e SHBA-së nga Kansasi të martën, sipas parashikimeve të mediave amerikane.
Ai mundi republikanin në detyrë, Roger Marshall, duke u bërë demokrati i parë që fiton një garë për Senatin në këtë shtet konservator dhe kryesisht rural, që nga viti 1932.
Ky rezultat është një goditje për ish-presidentin Donald Trump, i cili fitoi në Kansas me një diferencë prej më shumë se 10 pikësh në secilën nga tri fushatat e tij presidenciale.
Javën e kaluar, ai udhëtoi drejt këtij shteti – vizita e tij e parë atje që nga viti 2018 – për të kërkuar mbështetje për Marshall.
Hamiltoni, pastor i një kishe të madhe metodiste, i cili deri vonë ishte i regjistruar si republikan, kishte menduar të kandidonte si i pavarur përpara se të hynte në garë si demokrat.
Ai zhvilloi fushatë si një politikan i moderuar, duke mbajtur distancë nga drejtuesit kombëtarë të partisë dhe duke u zotuar se nuk do ta mbështeste Chuck Schumerin si udhëheqës të shumicës në Senat.
Ai gjithashtu kritikoi mënyrën se si administrata e ish-presidentit Joe Biden e trajtoi çështjen e imigracionit.
Hamiltoni i përqendroi kritikat e tij kryesisht ndaj Marshallit dhe republikanëve në Kongres e jo ndaj ish-presidentit.
"Unë nuk po kandidoj kundër ish-presidentit Trump", tha ai gjatë debatit të tyre të fundit.
Nga ana tjetër, Marshall u tha votuesve se mbështetja për të nënkuptonte mbështetje për agjendën e ish-presidentit.
Të dy kandidatët u përplasën gjithashtu lidhur me tarifat. Hamilton bëri thirrje për heqjen e tarifave të vendosura nga Trumpi dhe kërkoi që çdo tarifë e re të miratohej nga Kongresi, ndërsa Marshall këmbënguli se ato po jepnin rezultate.
Shumë fermerë në Kansas, të cilët tashmë po përballeshin me kosto të larta të karburantit – të nxitura nga lufta në Iran – janë goditur nga tarifat hakmarrëse që prekin eksporte të tilla si soja dhe gruri. Blegtorët u zemëruan nga një plan i Trump-it për të lehtësuar tarifat mbi importet e mishit të viçit.
Në qarkun rural Neosho, ku dy vjet më parë 73 për qind e votuesve mbështetën Trumpin, në javët e fundit të fushatës u shfaqën tabela mbështetëse për Hamiltonin.
"Mendoj se njerëzit thjesht kanë nevojë dëshpërimisht për pak normalitet", tha për AFP-në, Travis Falstad, 53 vjeç, një votues me prirje të majta në këtë qark, përpara votimit.
