Kapet me 178 km/h në zonën 60 në Shtime, ndëshkohet shoferi me 500 euro dhe 6 muaj pa patentë

Policia e Kosovës ka gjobitur një person, A.M 49 vjeç, pasi që i njëjti ka drejtuar veturën e tij me shpejtësi 178 km/h, në zonën ku kufizimi i shpejtësisë ishte 60 km/h.

PK-ja përmes njoftimit ka bërë të ditur se, shoferi i ka shqiptuar gjobë në vlerë prej 500 eurosh, si dhe masa mbrojtëse e ndalimit të drejtimit të automjetit për gjashtë muaj në territorin e Kosovës.

Njoftimi i i plotë:

Ndëshkohet një shofer për shpejtësi në Shtime

Zyrtarët policorë të Njësisë Rajonale të Komunikacionit Rrugor, në kuadër të kontrolleve të shtuara në trafik me qëllim parandalimin e aksidenteve dhe rritjen e sigurisë rrugore, më datën 06.08.2026, kanë identifikuar një kundërvajtje të rëndë në trafik.

Rreth orës 09:42, në rrugën transitore, segmenti Davidovc–Belincë, në Komunën e Shtimes, zyrtarët policorë kanë ndaluar një shofer i cili me veturën e tij ishte duke qarkulluar me shpejtësi tej kufizimit të lejuar.

Shoferi A.M. (49 vjeç), duke drejtuar veturën e markës BMW M5, me ngjyrë të kaltër dhe me targa të huaja, është regjistruar duke zhvilluar shpejtësi 178 km/h, në zonën ku kufizimi i shpejtësisë ishte 60 km/h.

Ndaj kundërvajtësit është shqiptuar gjobë në vlerë prej 500 eurosh, si dhe masa mbrojtëse e ndalimit të drejtimit të automjetit për gjashtë muaj në territorin e Republikës së Kosovës.

Policia Rajonale e Ferizajt mbetet e përkushtuar në zbatimin e ligjit dhe do të vazhdojë me kontrolle të rregullta dhe aktivitete të intensifikuara në trafik, me qëllim mbrojtjen e jetës dhe sigurisë së të gjithë pjesëmarrësve në komunikacion.

Policia fton qytetarët që të bashkëpunojnë dhe të raportojnë çdo shkelje apo rrezik në trafik përmes numrave kontaktues:

 192

 0290/326-250

 0290/322-406

ose përmes aplikacionit “Lajmëro Policinë”.

Të gjitha informacionet e pranuara nga qytetarët trajtohen me konfidencialitet të plotë.

Rodri zgjedh Barcelonën, refuzon Real Madridin

Read more