Sot mbahet seanca ndaj Jeton Sylajt, Gjykata vendos që të jetë e mbyllur për publikun

Gjykata Themelore në Pejë do të mbajë sot, më 12 nëntor, shqyrtimin fillestar në çështjen penale ndaj Jeton Sylajt, bashkëshortit të Arlinda Zekajt.

Seanca, e cila është caktuar të fillojë nga ora 11:00, do të zhvillohet pa praninë e publikut, bazuar në vendimin e marrë nga gjykata më 10 nëntor 2026.

Vendimi për përjashtimin e publikut është marrë me qëllim të mbrojtjes së jetës private dhe familjare të të pandehurit, palës së dëmtuar dhe pjesëmarrësve të tjerë në procedurë, veçanërisht të një fëmije të mitur të përfshirë në këtë çështje.

Kërkesa për mbajtjen e seancës me dyer të mbyllura ishte paraqitur nga Prokuroria Themelore në Pejë, me arsyetimin se gjatë procedurës do të trajtohen informacione të ndjeshme që lidhen me jetën private dhe familjare të personave të përfshirë.

Sipas aktvendimit të siguruar nga “Betimi për Drejtësi“, seanca u vendos të mbyllet me kërkesë të Prokurorisë, me qëllim të mbrojtjes së jetës personale dhe familjare të të pandehurit, palës së dëmtuar dhe pjesëmarrësve tjerë në procedurë.

“MBYLLET për publikun: Shqyrtimi fillestar i datës 12.11.2026, në çështjen e lartcekur penale me qëllim të mbrojtjes së jetës personale dhe familjare e të pandehurit, palës së dëmtuar dhe pjesëmarrësve tjerë në procedurë”, thuhet në aktvendimin e 10 nëntorit 2026, të marrë nga gjyqtarja Selvije Morina-Zejnaj.

Në mesin e materialeve që do të shqyrtohen janë deklarimet e të pandehurit dhe palës së dëmtuar, raportet e bashkëbisedimeve me fëmijën e mitur, raporti psikologjik dhe video-incizimet që gjenden në shkresat e lëndës.