Muzika terapeutike me teknologji zanore ul ankthin më shpejt sesa tingujt e tjerë
Një studim i publikuar në revistën shkencore PLOS Mental Health sugjeron se muzika e krijuar posaçërisht për efekte terapeutike mund të ofrojë lehtësim më të shpejtë dhe më efektiv të simptomave të ankthit sesa tingujt e njohur si “pink noise”.
Sipas studimeve të mëhershme, muzika është lidhur me përfitime të shumta shëndetësore, duke përfshirë përmirësimin e humorit, funksionit kardiovaskular dhe aftësive njohëse, shkruan Medical News, transmeton Gazeta Shneta.
Megjithatë, ky hulumtim i ri fokusohet në një qasje më të avancuar: përdorimin e muzikës së kombinuar me auditory beat stimulation (ABS).
ABS është një teknikë që përdor impulse të rregullta zanore për të ndikuar në ritmet e trurit, duke e zhvendosur atë nga një gjendje stresi në një gjendje më të relaksuar.
Studimi u realizua nga studiues të Goldsmiths, University of London dhe University of Roehampton në Mbretërinë e Bashkuar, si dhe nga ekspertë të Toronto Metropolitan University dhe kompanisë së shëndetit digjital LUCID në Kanada.
Në studim morën pjesë 144 të rritur që po përdornin ilaçe kundër ankthit dhe u ndanë rastësisht në grupe të ndryshme dëgjimi, për të krahasuar efektet e muzikës me ABS dhe “pink noise”.
Rezultatet treguan se pjesëmarrësit që dëgjuan muzikë me ABS për vetëm 24 minuta patën ulje të ndjeshme të simptomave të ankthit, duke sugjeruar një efekt më të shpejtë relaksues krahasuar me tingujt standardë të ambientit si “pink noise”, që përdoret shpesh për gjumë dhe qetësim.
Studiuesit theksojnë se këto gjetje hapin rrugë për zhvillimin e terapive jofarmakologjike më të personalizuara për menaxhimin e ankthit, megjithëse nevojiten studime të mëtejshme për të kuptuar efektet afatgjata të kësaj metode.
