Stërvitja me pesha gjatë shtatzënisë mund të ulë rrezikun e diabetit gestacional

Një studim i ri sugjeron se stërvitja e forcës gjatë shtatzënisë mund të ndihmojë në uljen e rrezikut për diabet gestacional dhe të përmirësojë mirëqenien e grave shtatzëna. Megjithatë, studiuesit theksojnë se nevojiten kërkime të mëtejshme për të konfirmuar këto rezultate.

Studimi, i publikuar në revistën shkencore “Acta Obstetricia et Gynecologica Scandinavica”, përfshiu 209 gra shtatzëna me mbipeshë ose obezitet, të cilat u ndanë në mënyrë rastësore në dy grupe.Njëri grup ndoqi një program të strukturuar të stërvitjes së forcës, ndërsa grupi tjetër vazhdoi me kujdesin e zakonshëm gjatë shtatzënisë.

Programi nisi rreth javëve 12 deri në 14 të shtatzënisë dhe vazhdoi deri në javën e 36-të ose deri në lindje. Gratë kryenin seanca të mbikëqyrura një herë në javë dhe inkurajoheshin të ushtronin edhe në shtëpi, gjithsej rreth tri herë në javë.

Ushtrimet përfshinin përdorimin e peshave të lehta dhe shiritave elastikë të rezistencës.

Në grupin që ndoqi programin e ushtrimeve, 2 për qind e grave zhvilluan diabet gestacional, krahasuar me 7.3 për qind në grupin që mori kujdesin e zakonshëm. Megjithatë, diferenca nuk ishte statistikisht domethënëse, ndaj studiuesit nuk mund të thonë me siguri se stërvitja parandaloi diabetin.

Në një nëngrup të grave që iu përmbajtën programit dhe ushtruan të paktën dy herë në javë, asnjëra nuk zhvilloi diabet gestacional. Studiuesit paralajmërojnë se ky rezultat bazohet në një grup të vogël dhe nuk është i mjaftueshëm për të provuar një efekt parandalues.

Përmirësim i cilësisë së jetës

Përfitimet e ushtrimeve u vunë re më qartë në cilësinë e jetës dhe mirëqenien gjatë shtatzënisë.

Gratë që morën pjesë në programin e stërvitjes së forcës raportuan cilësi më të mirë të jetës dhe më pak simptoma të lidhura me shtatzëninë, përfshirë ankthin, lodhjen dhe dhimbjet e shpinës ose legenit.

Studimi nuk gjeti rritje të dukshme të komplikimeve të shtatzënisë. Shkalla e lindjeve të parakohshme dhe aborteve spontane ishte e ngjashme në të dyja grupet.

Autorja kryesore e studimit, Teresa E. Santa Cruz nga Hospital Universitario Donostia në San Sebastián të Spanjës, tha se rezultatet sugjerojnë se ndjekja e një programi të strukturuar të stërvitjes së forcës gjatë shtatzënisë mund të ndihmojë në uljen e rrezikut për diabet gestacional, ndërsa njëkohësisht përmirëson mirëqenien e nënës.

Studiuesit theksojnë se nevojiten studime të tjera për të konfirmuar gjetjet dhe për të përcaktuar mënyrën më të sigurt dhe efektive të përfshirjes së stërvitjes së forcës në kujdesin rutinë gjatë shtatzënisë.