Ardian Ismajli largohet nga grumbullimi i Shqipërisë

Kombëtarja e Shqipërisë nuk do të mund të llogarisë në shërbimet e mbrojtësit Ardian Ismajli për dy ndeshjet miqësore të muajit qershor.

Federata Shqiptare e Futbollit ka bërë të ditur se futbollisti është larguar nga grumbullimi i ekipit kombëtar për shkak të problemeve muskulore, pas një vlerësimi të gjendjes së tij fizike në bashkëpunim me stafin teknik.

Sipas njoftimit të FSHF-së, Ismajli ishte bashkuar fillimisht me skuadrën, por nuk ka qenë në gjendjen e duhur për të përballuar ngarkesën e dy sfidave të planifikuara.

“Ismajli iu bashkua fillimisht ekipit kombëtar, por duke qenë se vinte pas një problemi muskulor që e kishte mbajtur larg fushave për disa javë dhe ishte rikthyer në lojë vetëm në ndeshjen e fundit të sezonit, ai u paraqit në kushte fizike jo optimale dhe nuk ishte plotësisht i gatshëm për dy ndeshjet miqësore të planifikuara”, thuhet në njoftimin e FSHF-së.

Vendimi për largimin e mbrojtësit nga grumbullimi është marrë në koordinim me trajnerin e ri të Kombëtares shqiptare, Ronaldo Maran, i cili po përgatit ekipin për ndeshjet e para nën drejtimin e tij.

Shqipëria do të zhvillojë dy ndeshje miqësore gjatë këtij muaji. Kuqezinjtë fillimisht do të përballen me Izraelin më 3 qershor, ndërsa tri ditë më vonë, më 6 qershor, do të luajnë ndaj Luksemburgut.

Mungesa e Ismajlit konsiderohet një goditje për repartin defensiv të Shqipërisë, megjithatë stafi teknik ka vendosur të mos rrezikojë me gjendjen e lojtarit, duke i dhënë kohën e nevojshme për rikuperim të plotë.