Zyrtare: Bernali pezullohet me katër ndeshje, pas sulmit ndaj Yamalit

Komiteti Disiplinor i Federatës Spanjolle të Futbollit ka marrë vendimin për Facundo Bernalin, mesfushorin e Real Betisit, duke e dënuar me katër ndeshje pezullim pas incidentit me Lamine Yamalin gjatë përballjes ndaj Barcelonës.

Bernal u ndëshkua me karton të kuq në ndeshjen e së shtunës, të cilën Barcelona e fitoi me rezultat 5-2. Incidenti ndodhi në pjesën e dytë, pasi Betisi kishte barazuar shifrat në 2-2.

Sipas raportit të gjyqtarit, futbollisti uruguaian e kapi Yamalin për qafe dhe e goditi dy herë me kokë në fytyrë, ndërsa topi nuk ishte në lojë. Për këtë arsye, Komiteti Disiplinor e klasifikoi veprimin si agresion dhe vendosi dënimin prej katër ndeshjesh.

Klubi nga Sevilla kishte paraqitur ankesë kundër vendimit të gjyqtarit, duke pretenduar se ndëshkimi ishte i tepruar dhe se raporti nuk e pasqyronte saktë gjithë situatën. Megjithatë, komiteti i hodhi poshtë pretendimet e Betisit pas shqyrtimit të pamjeve.

Bernal do të mungojë në një ndeshje të Kupës së Mbretit dhe në tri ndeshje të kampionatit spanjoll, përfshirë derbin ndaj Sevillas, sipas kalendarit të raportuar.

Sanksionet nuk u kufizuan vetëm te mesfushori. Drejtori sportiv i Real Betisit, Manu Fajardo, u pezullua për dy ndeshje për sjellje të konsideruar në kundërshtim me rregullat sportive.

Ndërkohë, trajneri Manuel Pellegrini, i cili kishte kritikuar vendimin për përjashtimin e Bernalit, mori vetëm një paralajmërim për komentet e tij ndaj gjyqtarëve.

Real Betisi ka bërë të ditur se do ta dërgojë çështjen në organin e apelit, pasi e konsideron dënimin e lojtarit joproporcional me atë që ndodhi në fushë.