121 milionë euro për trajnerët, Manchester United nuk gjen qetësi që nga Fergusoni
Largimi i Sir Alex Ferguson në vitin 2013 nisi një periudhë të vështirë për Manchester Unitedin, i cili nuk ka arritur të ndërtojë një projekt të qëndrueshëm në stol.
Me shkarkimin e Michael Carrick, numri i trajnerëve të larguar në këtë periudhë ka arritur në 11, ndërsa shpenzimet për kompensimet e tyre kapin shifrën e rreth 121 milionë eurove.
Lista është e gjatë dhe përfshin emra të njohur si David Moyes, Louis van Gaal, José Mourinho, Ole Gunnar Solskjaer, Erik ten Hag dhe Ruben Amorim.
Asnjëri nuk arriti ta rikthejë Unitedin në majën e futbollit anglez, ndërsa ndryshimet e vazhdueshme nuk sollën stabilitetin e pritur.
Mourinho ishte largimi më i kushtueshëm, me 23.4 milionë euro kompensim, ndërsa Van Gaalit iu paguan 10 milionë euro dhe Rangnickut 17.6 milionë.
Edhe aventura e Amorimit përfundoi me një faturë prej 9.8 milionë eurosh për klubin.
Tashmë sytë janë te Mauricio Pochettino, i cili shihet si pasuesi i Carrickut.
Për ta marrë nga kombëtarja amerikane, Manchester United duhet të paguajë klauzolën prej 8.8 milionë eurosh.
Kështu, klubi vazhdon të shpenzojë miliona për trajnerë, pa arritur të gjejë formulën për t'u rikthyer në majë. /Zëri
