Çelësat e veturës “Peugeot 206”, e cila ndahet nga “MercomCompany”, fituesit fatlum Gëzim Mehmeti nga Prishtina ia dorëzoi këngëtarja jonë e mirënjohur, Nora Istrefi. “Zëri” vazhdon lojën shpërblyese me shpërblime edhe shumë më të mëdha se deri më tash...

Në Prishtinë, në sheshin “Nëna Tereze”, para hotelit “Swiss Diamond Prishtina” (ish- hoteli Iliria), është zhvilluar të hënën ceremonia e ndarjes së shpërblimit kryesor të Lojës së Madhe shpërblyese të gazetës “Zëri”, pjesa e tretë, vetura “Peugeot 206”, e cila ndahet nga kompania “MercomCompany”.

Në këtë ceremoni ishin të pranishme shumë media kosovare dhe qytetarë të shumtë. Fituesi fatlum i kësaj dhurate të mrekullueshme ishte Gëzim Mehmeti nga Prishtina, i cili ndjehej tejet i lumtur që ka fituar një çmim të tillë, pikërisht në ditën e ndërrimit të moteve.

Çelësat e kësaj veture, Gëzimit ia dorëzoi këngëtarja jonë e mirënjohur, Nora Istrefi, e cila e përgëzoi Gëzimin, por edhe djalin e tij të vogël Diellin, për shpërblimin e fituar. Gëzimi nuk mund t’i fshihte emocionet që kishte me rastin e marrjes së shpërblimit dhe, duke treguar se është një lexues i rregullt i gazetës, ai falënderoi gazetën për këtë shpërblim të madh, ndërsa i porositi qytetarët që ta blejnë gazetën “Zëri”, jo vetëm për shkak të lojës shpërblyese, por për përmbajtjen e saj.

“Jam një lexues i rregullt i ‘Zëri’-t tashmë disa vite. Unë nuk e kam blerë asnjëherë gazetën ‘Zëri’ për shkak të lojës shpërblyese, por për shkak se është gazeta me përmbajtjen më të mirë. Unë jam shumë mirënjohës për këtë shpërblim nga gazeta ‘Zëri’, ndërsa i porosis të gjithë që ta blejnë këtë gazetë, jo vetëm për shkak të lojës shpërblyese, por për shkak të përmbajtjes cilësore që ka ajo”, është shprehur Gëzimi, pas pranimit të çelësave të veturës. Edhe Dielli i vogël dukej i lumtur me këtë shpërblim, pasi vazhdimisht hynte në veturë dhe dilte nga vetura e re.

31 dhjetori 2011, dita me fat për Gëzimin

Gëzimi ka folur edhe për momentet kur ka kuptuar se ishte fituesi i veturës “Peugeot 206” të lojës shpërblyese në “Zëri”. “Ditën e premte, më 30 dhjetor 2011, kam shkruar për të blerë gjëra ushqimore për festën e fundvitit. Meqë jam lexues i rregullt i gazetës ‘Zëri’, desha ta blej gazetën në një qendër tregtare ku isha, por duke menduar se ka mundur ta blejë dikush nga familja gazetën më herët, hoqa dorë dhe e lashë derisa të kthehesha në shtëpi.

Dhe, pasi u ktheva, e kuptova se ende askush nga familja nuk e kishte blerë gazetën, dola që ta blej”, ka rrëfyer Gëzimi. Në mëngjes, ai kishte dalë për të blerë edhe disa gjëra të tjera që i nevojiteshin dhe, me këtë rast, e kishte blerë edhe gazetën.

Ai, pasi kishte gërvishtur kuponin dhe kishte lexuar “Urime keni fituar çmimin kryesor, veturën “Peugeot 206’, nuk kishte mundur të besonte dhe ia kishte treguar gazetën shitëses, e cila ia kishte konfirmuar. “Në mëngjes kam shkuar në dyqanin e afërm për të blerë edhe disa gjëra që më nevojiteshin.

Dhe, pasi kam marrë gjërat që kisha nevojë, e kam blerë edhe gazetën ‘Zëri’. Dhe, aty për aty kam filluar ta gërvisht kuponin dhe nuk u besoja syve nga ajo që shihja. Në kupon shkruante: “Urime, jeni fitues i çmimit kryesor, ‘Peugeot 206’.

Ia kam treguar gazetën shitëses, dhe ajo e konfirmoi se vërtet kisha fituar. Nuk di si t’i përshkruaj ato momente. Isha i përfshirë nga emocionet dhe mezi prisja të shkoja në shtëpi, për t’ua kumtuar lajmin e lumtur familjarëve”, ka shtuar Mehmeti.

Në fillim nuk i kishte besuar askush që kishte fituar

Gëzimi ka rrëfyer se, kur është kthyer në shtëpi, ishin vetëm dy fëmijët e tij të vegjël, të cilët kishin filluar të kërcenin dhe të bërtisnin nga gëzimi, ndërsa menjëherë e kishte telefonuar bashkëshorten për t’ia dhënë edhe asaj lajmin e gëtueshëm, por që ajo nuk i kishte besuar dhe kishte menduar se po tallej me të.

“Fëmijët filluan të kërcenin dhe bërtisnin nga gëzimi. Më pas e telefonova gruan time, por ajo nuk më besonte. Më thoshte se po tallesha me të. Dhe, vetëm kur është kthyer në shtëpi dhe e ka parë me sytë e vet kuponin fitues, është bindur dhe ka filluar vërtet të gëzohet”, ka theksuar Gëzimi, i cili ka shtuar se të njëjtin mosbesim e kishin edhe shokët e tij të punës.

“Pas kësaj kam filluar t’u telefonoj kolegëve të punës, duke u thënë se të mos shpresojnë më në veturën që jepet nga ‘Zëri’, por vetëm në shpërblime të tjera. Ata nuk u besonin fjalëve të mia, por talleshin me mua në forma të ndryshme. Edhe ata vetëm atëherë kur e kanë parë gazetën me kuponin fitues, kanë filluar të besojnë edhe pse disa më thoshin se nuk do ta japin kurrë veturën. Por, tani ata do të binden kur të më shohin me veturën e re”, ka rrëfyer Gëzimi.

“Zëri” vazhdon të shpërblejë lexuesit

Ndarja e veturës së tretë nuk do të jetë fundi i lojës së madhe shpërblyese në gazetën “Zëri”, në të cilën deri më tash për lexuesit janë shpërndarë rreth 18.000 shpërblime, ku vetëm gjatë 15 javëve sa ka zgjatur pjesa e tretë e lojës shpërblyese e gazetës ‘Zëri’, janë shpërndarë më shumë se 7500 shpërblime të vlefshme: 15 iPhone 4 nga Europrinty, 15 Sony Playstation 3, 15 DVD Player, çdo ditë 2 kuponë me vlerë 50 auro nga Minimax Shopping Center, çdo ditë 4 x kartela me nga 50 euro nga Raiffeisen Bank; 150 kartela me vlerë 20 euro, 5 x 200 euro dhe 2 x 500 euro nga Banka Ekonomike dhe çdo ditë 70 x 5 euro mbushje telefoni nga Vala, pako me stripa dhe software kontabiliteti nga Expik si dhe abonime 6 mujore nga GYM.

Së shpejti do të vazhdohet me lojën, e cila për lexuesit besnikë të gazetës do të sjellë shpërblime dhe risi edhe më të mëdha. Këtë e ka konfirmuar edhe kryeredaktori i gazetës ‘Zëri’, Astrit Gashi. “Loja e madhe shpërblyese në gazetën tonë ka pasur për qëllim që lexuesve tanë, përveç shkrimeve të ndryshme, në njëfarë forme t’u japë edhe shpërblime, apo më mirë të them dhurata.

Loja gjithsesi e ka pasur efektin e vet dhe ka shtuar jashtëzakonisht shumë numrin e lexuesve. Por, gazeta ‘Zëri’ nuk do të ndalet vetëm me kaq, pasi së shpejti, besoj nga fillimi i muajit shkurt, do të vazhdohet me lojën.

Edhe pse ende nuk dihet se cili do të jetë fondi i shpërblimeve, ajo që mund të them është se do të ketë befasi dhe shpërblime të shumta, të cilat do ta pasurojnë dhe do ta bëjnë edhe më argëtuese gazetën tonë”, është shprehur Gashi.