Anketat e vazhdueshme me lexuesit e gazetës “Zëri”, tregojnë se interesimi për gazetën vazhdon të rritet çdoherë dhe kjo falë cilësisë dhe raportimit të drejtë dhe të pavarur.

Gjithashtu, lexuesit nuk e fshehin as faktin se loja e madhe shpërblyese, vetëm sa e ka bërë edhe më tërheqëse për lexuesit. Mundësia për të fituar çmime të mëdha dhe të lloj-llojshme, është një motiv shtesë për lexuesit, ngase kjo mënyrë e shpërblimit të lexuesve, është risia më e madhe që një medium siç është gazeta “Zëri”, që ka sjellë në tregun medial të Kosovës.

Shumë kryeqytetas të anketuar, kanë dhënë vlerësimin maksimal për gazetën, përmbajtjen e saj dhe mënyrën e punës së stafit të gazetës. Demir Nuredini ka theksuar se nuk e blen “Zëri”-n vetëm për shkak të lojës, por për faktin se në këtë gazetë gjen shumëçka për të lexuar dhe se ajo është gazeta më e pavarur në treg. “Gazetën ‘Zëri’ e blej jo vetëm për të luajtur por më shumë për ta lexuar.

Për mua vazhdon të mbetet e përditshmja më cilësore dhe e pavarur në tregun medial. Tani kam përshtypjen që pjesa dërrmuese e popullatës së vendit janë bërë lexues të rregullt të ‘Zëri’-t, sepse përveç posedimit të artikujve të shumtë, ku mund të informohen lexuesit, është krijuar mundësia edhe për të fituar me anë të lojës ‘Lexo dhe Fito’. Andaj, me plot bindje them se kjo lojë ka ndikuar edhe te kërkesa e më shumë lexuesve të ‘Zëri’-t.

Por sido që të jetë uroj që çdo lexues të shpërblehet me ndonjë çmim ashtu siç jam shpërblyer edhe unë”, është shprehur z.Nuredini. Faton Drenovci ka deklaruar se tanimë i është bërë shprehi që kafenë e mëngjesit ta pijë duke e lexuar “Zëri”-n, pasi kjo gazetë sipas tij, informon drejt dhe pa pasur ndikim politik. “Shprehi e imja tani është bërë që mëngjesin ta nis me kafe dhe me lexim të gazetës ‘Zëri’.

Jam ithtar i kësaj gazete sepse informohem për shumë gjëra që ndodhin në vend dhe jashtë vendit. Është gazeta e parë që informon shpejt, drejt dhe lirshëm pa pasur ndikim politik. Ndonëse tashmë e disa muaj edhe loja ‘Lexo dhe Fito’ e ka bërë të veten, sepse po arrin të zgjojë kërshërinë e popullatës, ku me anë të saj po arrijnë të shpërblehen me dhurata të ndryshme”, thekson Fatoni.

Në anën tjetër, Shkëltrim Maliqi ka vlerësuar mjaft shumë mundësinë që gazeta “Zëri”, ua ka dhënë lexuesve të saj që përveç leximit, edhe të fitojnë dhurata të vlefshme. “Kohëve të fundit kudo po shoh njerëz me gazetën ‘Zëri’ në duar, ndoshta kjo për faktin se shumë lexues po arrijnë të marrin dhurata.

Është mjaft stimuluese kur me 30 centë po arrin të marrësh një dhuratë të madhe siç janë iphone 4, playstation, të holla me vlera të mëdha nga banka dhe qendra të ndryshme tregtare, pastaj skuterë, veturë, e shumë dhurata të tjera që patjetër e shtyn lexuesin të blejë këtë gazetë. ‘Zëri’ me këtë lojë ka treguar humanitetin e vet dhe njëtrajtësisht edhe kualitetin që ka bashkë me stafin e vet”, është shprehur i riu Shkëltrim Maliqi.

“Zëri” vazhdon ta mbajë primatin në Gjakovë

“Zëri” në Gjakovë, po vazhdon të lexohet me interes të madh dhe të çmohet në mesin e gazetave më profesionale në tregun medial të Kosovës. Këtë fakt e potencojnë lexuesit e shumtë të kësaj gazete.

“Zëri” gjithmonë e ka dëshmuar profesionalizmin e vet me korrektësinë e treguar në shkrimet e përditshme dhe me qasjen ndaj problemeve aktuale në Kosovë. Konsideroj se si gazetë, e keni arritur maksimumin me inicimin e fushatës për përdorimin e produkteve vendore, e cila ka pasur jehonë të mirë në opinionin kosovar”, thotë Halil Halilabazi, një i ri nga Gjakova.

Ai shton gjithashtu se është lexues i rregullt dhe pjesëmarrës i përhershëm në lojën shpërblyese, ndonëse deri më tani nuk e ka pasur fat të jetë në mesin e fituesve të ndonjërit prej shpërblimeve. “Deri tani më ka munguar fati, por, shpresoj që sa për satisfaksion personal të jem ndonjëri prej fituesve të kësaj loje shpërblyese”, ka thënë ai.

Edhe Fahredin Beqa thotë se e lexon me qejf “Zëri”-n, ndërsa shkak për të qenë lexues i rregullt thotë se janë editorialet profesionale dhe opinionet tjera në gazetë. “Editorialet, që mesa kuptoj unë bëhen nga stafi redaktues i gazetës, shprehin pikërisht atë që po ndodh në realitet dhe atë që e mendojnë edhe vetë qytetarët.

Këtë nuk po e them duke u bazuar në mendimet e mia, por po bazohem në bisedat e shumta dhe analizat që i bëj me shokët e mi gjatë ditës”, ka thënë Beqa. Ndërkohë, “Zëri”, po lexohet edhe nga ata që nuk e kanë shumë merak politikën, pasi në të po gjejnë shkrime edhe për preferencat e tyre.

“E blej për sportin, sepse ofron materiale të shumta dhe interesante si nga sporti vendor ashtu edhe nga ai ndërkombëtar. Megjithatë, në krah të sportit, e lexoj edhe pjesën tjetër të gazetës, për të cilën kam vetëm fjalë të mira”, thotë Korab Zhuri.

Sa i përket lojës shpërblyese, gjakovarët po vazhdojnë të jenë fitues të herëpashershëm të çmimeve ditore, por, gjithashtu po presin me padurim që në qytetin e tyre të vijë edhe ndonjëri prej çmimeve të mëdha.

Artan Z. Haraqia.