Gazeta “Zëri” vazhdon të pëlqehet me të madhe nga të gjitha shtresat e popullatës dhe në të gjitha komunat e Kosovës, por edhe nga diaspora jonë. Ata të gjithë njëzëri pohojnë se “nuk ka gazetë më të mirë dhe e cila drejt e paanshëm informon për të gjitha që ndodhin në vend dhe jashtë, por njëherësh edhe shpërblen me çmime të mrekullueshme, të cilat janë të mirëseardhura në këto ditë krizash”.

E dashur edhe për sportistët

Mitrovicë. “Zëri” lexohet me të madhe edhe nga sportistët. Kjo është arritur falë përmbajtjes së gazetës dhe lojës shpërblyese, nëpërmjet së cilës për çdo ditë po ndahen qindra shpërblime. Sylejman Meholli thotë se ka respekt të veçantë për gazetën “Zëri”, të cilën e lexon vazhdimisht.

Sipas tij, gazeta vazhdon të kërkohet nga të gjitha moshat. “Kjo gazetë ka krijuar imazh të mirë, kurse kjo ka bërë që ‘Zëri’ të jetë ndër më të lexuarat në vend. Unë personalisht çdo ditë e marr ‘Zërin’”, tha Bajram Çerkini, nga Shoqata e personave të pagjetur në Mitrovicë.

Interesimi për gazetën ‘Zëri’ është i madh, tha Meholli, sipas të cilit, kjo dëshmohet me faktin se nëse nuk e merr herët gazetën mbetesh pa të. “Unë jam adhurues i kësaj gazete, sepse përveç lojës ‘lexo dhe fito’, nëpërmjet saj lexuesit informohen për çdo gjë që ndodh në vend dhe jashtë tij.

Edhe loja shpërblyese ka ndikuar në rritjen e lexuesve sepse falë saj gazeta është bërë më interesante”, ka theksuar Çerkini. Ai shtoi “Zëri” ka senzibilizuar çështjen e të pagjeturve në rajonin e Mitrovicës. “Zëri” po e rrit numrin e lexuesve edhe në mesin e sportistëve.

Për këtë flasin edhe shitësit e gazetave Qerim Voca, Ali Shala, Bajram Rexhepi, sipas të cilëve punëtorët e sportit, trajnerët dhe lojtarët aktivë në Mitrovicë janë duke e lexuar me të madhe këtë gazetë.

Gani Sejdiu, trajner i KF Trepça 89, tha se ‘Zërin’ e lexon me dëshirë, pasi në të gjen gjëra interesante nga lëmi i sportit, kurse sipas tij, nga sivjet kjo gazetë është begatuar edhe me lojën e madhe shpërblyese, e cila gjithsesi e ka shtuar numrin e lexuesve të të gjitha moshave dhe profesioneve. Shpetim Idrizi, njëri ndër futbollistët më të mirë të Trepçës 89, tha se sa herë që i jepet rasti e lexon “Zërin” pasi është e pasur me artikuj interesantë nga sporti.

Idrizi thotë se me ëndje i lexon edhe artikujt tjerë në gazetë, që kanë të bëjnë me aktualitetin dhe zhvillimet në komunën e Mitrovicës, kurse të dielave ia kushton kohën e tij mbushjes së fjalëkryqit. Taip Kabashi, trajneri i hendbollit, ka konstatuar se “Zëri” me lojën e madhe shpërblyese, ka ngjallur interesimin për këtë gazetë, të cilën çdo blerës para se të fillojë ta lexojë e bën gërvishtjen e kuponit për të provuar fatin.

Ai na tha se përkundër faktit se deri tash nuk ka fituar ndonjë shpërblim, do të vazhdojë ta lexojë këtë gazetë edhe në të ardhmen pasi ajo vazhdimisht po pasuron përmbajtjen e saj. Emin Baliqi, profesor i edukatës fizike dhe futbollist i Trepçës 89, thotë se përcjell shkrimet e sportit në “Zëri”, pasi nga ajo mëson për atë se çka ka ndodhur në arenat sportive në vend e botë.

Ai tha se i ka pëlqyer edhe ideja për lojën shpërblyese, e cila ka joshur njerëzit që ta blejnë gazetën, me shpresë se do të jenë fitues të ndonjë shpërblimi. Edhe Ali Zasella, kryetar i Lidhjes Rajonale të Futbollit, thotë se te gazeta “Zëri” i pëlqen dizajni dhe shtojcat për të rinj, automobilizëm, teknologji, shtojca e fjalëkryqit, të cilat këtë gazetë e kanë bërë kampione të Kosovës. / B. Abazi

Lexohet nga faqja e parë deri në të fundit

Gjilan. Ahmet Aliu, dikur shofer e tashti pensionist, nuk lë ditë pa blerë nga dy gazeta, por e pashmangshme në shtëpinë e tij është gazeta “Zëri”, të cilën e lexon që nga numri i parë i saj. Ahmet Aliu, pos që është lexues i rregullt, ai ka edhe një veçori tjetër, nuk e blen gazetën vetëm se është lexues i ndonjë rubrike, porse atë e lexon të tërën, që nga faqja e parë e deri te e fundit.

“‘Zëri’ më pëlqen shumë, më shumë se çdo gazetë tjetër. Nuk ka ditë që nuk i marrë nga dy gazeta, por atë që nuk e ndërroj kurrë është gazeta ime e pëlqyer ‘Zëri’, e cila sjell materiale shumë interesante”, thotë Ahmet Aliu. Duke qenë lexues i rregullt, pashmangshëm që ai ka qenë edhe fitues i disa shpërblimeve, por jo i atyre të mëdha, por fitues i mbushjeve telefonike.

Ahmeti thotë se e ka blerë gazetën edhe kur nuk e kishte lojën, e blen edhe tashti dhe do ta blejë edhe në të ardhmen, fitoi apo jo, ngase siç thotë ai, loja mbetet lojë e leximi është diç tjetër. Ndryshe, ‘Zëri’ vazhdon të mbetet numër një ndër lexuesit e Gjilanit, mbetet gazeta më e pëlqyer e të rinjve, por edhe e atyre më në moshë dhe këtë e konfirmojnë edhe shitësit e gazetave, sipas të cilëve, kërkesat për gazetën “Zëri” janë të mëdha dhe vazhdimisht numri i lexuesve po rritet.

Sylejman Isnajli, ekonomist, thotë se i pëlqen t’i shfletojë gazetat ditore dhe ‘Zërit’ i beson shumë. Ai thotë se më tepër i pëlqen të lexojë sportin edhe pse as politikën nuk e lë anash. Lojën shpërblyese ai e sheh si diç që sjell kënaqësi te lexuesit. / E. Sadiku

Për të gjitha shtresat

Klinë. Lexues të shumtë të komunës së Klinës, i dërgojnë përshëndetje stafit menaxhues të gazetës “Zëri” dhe vetë punëtorëve të saj për një punë të mrekullueshme që po bëjnë për lexuesit. “Zëri” edhe si rëndom vazhdon ta ketë primatin e gazetës më të lexuar në komunën e Klinës dhe në çdo skaj të kësaj qyteze të Dukagjinit. Kastriot Desku, qytetar nga Klina, shpreh respektin e thellë që ka për “Zërin” duke thënë se “asnjë ditë nuk mund të qëndrojë pa e lexuar këtë gazetë”.

“Çdo mëngjes kur e shfletoj këtë gazetë disi me çelen sytë se po kam çka të lexoj në të, mirëpo fillimisht e gërvishti kuponin e lojës shpërblyese, e cila po e bën më interesant këtë gazetë”, tha ai. Ndërkohë, edhe qytetari tjetër Adem Krasniqi, tregon se “është mishëruar me gazetën ‘Zëri’”.

Ai është njëri nga lexuesit shumë me fat, dhe pothuajse çdo dy tre ditë, si lexues besnik i kësaj gazete, është fitues i njërit nga shpërblimet që kjo gazetë po jep. Kurse Zenel Elezaj, një nga lexuesit e ditëve të para të “Zërit” , e përgëzon stafin e kësaj gazete, për siç thotë ai, një punë të mrekullueshme që po i ofron lexuesve të saj. Sidoqoftë edhe publicistët tjerë nga Klina e admirojnë “Zërin”, si gazeta më serioze në Kosovë.

Mikel Gojani, shkrimtar nga kjo komunë, thotë se materialet që sheh në “Zëri”, nuk mund të lexojë në asnjë tjetër gazetë ditore. Ai uron që gazeta të vazhdojë me po të njëjtin ritëm, që të tubojë rreth vetes edhe lexues të tjerë, sepse siç tregon Mikeli, “Zëri” është gazetë për çdo shtresë të qytetarëve. Për shitjen e gazetave ditore tregojnë edhe distributorët në qytetin e Klinës. Enver Thaçi, shitës i gazetave ditore, thotë se “Zëri” çdo ditë e më tepër po përfiton lexues, që kurrë më parë nuk i kam parë duke e lexuar atë. / S. Haxhaj