E premtja ishte një ditë tejet e lumtur për shumë fitues të lojës shpërblyese të gazetës “Zëri”, por në veçanti gëzimin më të madh e kishin fituesit e shpërblimit iPhone 4 nga EuroPrinty, kur katër vetë i kanë tërhequr shpërblimet e tyre.

Smajl Zogaj nga Prizreni, nuk mund ta fshihte gëzimin e tij derisa e merrte telefonin e tij të ri. “Jam shumë i lumtur për këtë shpërblim të madh nga gazeta ‘Zëri’. Të them të drejtën nuk kam menduar se do të fitoj një çmim të tillë, por shpresën s’e kam humbur kurrë”, është shprehur z. Zogaj.

Ai vetë e kishte blerë dhe gërvishtur kuponin fitues, pasi është lexues i rregullt i gazetës ‘Zëri’ tashmë e disa vjet. “Vetë e kam blerë dhe gërvishtur kuponin. Jam lexues i pasionuar i gazetës ‘Zëri’ tashmë disa vjet dhe jo vetëm prejse ka filluar loja. E pëlqej shumë rubrikën e ekonomisë, por edhe faqet me lajme ditore”, ka përfunduar Zogaj.

Fituesi i radhës i iPhone 4 që e ka tërhequr të premten shpërblimin e tij, ishte Vesel Tola nga Gjakova, pjesëtar i policisë së Kosovës. Edhe Veseli është një lexues i rregullt i gazetës ‘Zëri’ tashmë e disa vjet, ndërsa ishte në punë kur e ka blerë dhe gërvishtur kuponin që i ka sjellë iPhone 4.

“‘Zërin’ e lexoj qe shumë vjet dhe nuk më shpëton asnjë numër. Ditën kur e kam blerë gazetën fituese, kam qenë në ndërrim në punë dhe pasi me kolegët kemi dalë për të pirë kafe gjatë pauzës, e kam shfrytëzuar për ta blerë ‘Zërin’. Nuk e kam gërvishtur kuponin menjëherë, por vetëm pasi e kam lexuar tërë gazetën. Dhe vërtet kam mbetur i befasuar kur e kam parë se kisha fituar iPhone”, është shprehur z.Tola, i cili e pëlqen gazetën në tërësi, pasi mendon se është gazeta më e pavarur, më reale dhe më e saktë në Kosovë.

Telefonin e ka fituar babai, e merr i biri

Fituesi tjetër i iPhone 4, ishte i riu Arianit Muhadri nga Prishtina. Mirëpo, ai e ka pranuar se nuk e ka blerë vetë gazetën fituese, por ishte babai i tij, i cili edhe e kishte gërvishtur kuponin.

“Unë nuk e kam blerë gazetën dhe as nuk e kam gërvishtur kuponin, por ishte babai im. Dhe pasi jam kthyer në shtëpi, ai më ka thënë se kishte fituar diçka në lojën shpërblyese në ‘Zëri’, por pa e ditur vlerën e çmimit. Vetëm atëherë kur i kam treguar unë se çfarë vlere ka, ai e ka kuptuar. Unë isha ai që jam gëzuar më së shumti, pasi babai shpërblimin ma ka dhënë mua”, është shprehur Arianiti.

Fituesi i iPhone-it të katërt që e dhuron kompania EuroPrinty, ishte Burim Latifi nga Ferizaj. Edhe Burimi ndjehej tejet i lumtur dhe mirënjohës që e ka fituar një shpërblim kaq të madh nga gazeta “Zëri”.

“Jam lexues i rregullt i gazetës dhe vërtet jam i lumtur që kam fituar një çmim të tillë. E falënderoj shumë gazetën ‘Zëri’ për mundësinë e dhënë për të fituar ne lexuesit”, është shprehur Latifi.

Mirëpo, këtu nuk përfundon me telefonat iPhone 4, pasi në lojë janë edhe shumë të tjerë, sikurse që janë edhe mijëra shpërblime të tjera, duke përfshirë SonyPlayStation 3, shpërblime në të holla nga Raiffeisen Bank, kuponë në vlerë 50 euro nga qendra tregtare MiniMax, pako me stripe nga EXPIK, 70 mbushje në vlerë 5 euro nga VALA, e shumë shpërblime të tjera, derisa deserti i kësaj loje është vetura Peugeot 206 nga “MercomCompany”, e cila e pret fituesin e vet.

“Zëri” përkujdeset për lexuesit e vet

Gazeta “Zëri” tashmë ka bërë emër në qytetin e Gjilanit, kurse besimin qytetarëve po ua kthen me paanshmëri, tema interesante, argëtim e me rubrika e risi nga më të ndryshmet.

Selami Haziri, mësimdhënës i Kulturës Fizike dhe Sportit në Gjimnazin “Zenel Hajdini” në Gjilan, është lexues i rregullt i kësaj gazete dhe sidomos i temave që kanë të bëjnë me aktualitetin e mbi të gjitha shkrimet në rubrikën e sportit.

Ai thotë se e pëlqen “Zëri”-n, ngase aty i kushtohet shumë rëndësi sportit vendor, por nuk lë pa përmendur edhe Lojën e Madhe Shpërblyese, e cila është një risi që po pëlqehet shumë nga lexuesit.

Sylejman Ismajli, ekonomist, nuk lë pa lexuar së paku dy gazeta në ditë, por për të “Zëri” mbetet gjithnjë një gazetë e besueshme, e cila siç thotë ai i sjell kënaqësi. Ismajli, thotë se deri më tashti nuk ka qenë fitues i ndonjërës nga shpërblimet që i ka ndarë gazeta “Zëri” gjatë Lojës së Madhe Shpërblyese dhe siç shton ai, lojën nuk e sheh më shumë se një pjesë argëtimi, ngase siç thotë ai, nuk e sheh të domosdoshme që të jetë fitues i ndonjërit nga shpërblimet.

Lexues i rregullt i “Zërit” mbetet edhe Selami Bunjaku, punëtor nga Gjilani, i cili besimin “Zërit” ia ka dhënë qysh moti. Sipas tij, “Zëri” ofron befasi nga më të ndryshme, duke qenë shumë më e shpejtë se gazetat tjera.

Ai nuk lë pa përmendur se “Zëri” u ka paraprirë shumë zhvillimeve, të cilat dolën më vonë të sakta, se mbulon tërë Kosovën me raporte dhe se ka kolumnistë të shkëlqyeshëm, sikurse që nuk lë anash as kulturën e sportin.

Ai thotë se për dallim nga gazetat tjera, “Zëri” përkujdeset edhe për lexuesit e vet, duke i bërë ata që të jenë pjesë e ndonjërit nga shpërblimet, andaj ai ka kërkuar që kjo gazetë të mbajë një ritëm të tillë.

Kudo, nëpër kioske, por edhe vetëshërbime, shitësit thonë se “Zëri” është nga gazete shumë e qëndrueshme që ka lexuesit e vet, andaj në to nuk mungon shitja dhe se një stabilitetit të tillë “Zëri” po e mban tash e sa kohë.

L.Xhema & E. Sadiku