Dëshmia tronditëse e burrit që vrau gruan: E zhvesha, e rraha dhe pastaj e hodha nga dritarja

Dyshoja tek gruaja ime. U zumë, debatuam ashpër. E futa në banjë, e zhvesha, e rraha dhe pastaj e hodha nga dritarja”.

Kështu ka deklaruar para oficerit të policisë gjyqësore dhe prokurorit të gatshëm Fredi Ruko 52 vjeç, autori i  vrasjes së bashkëshortes së tij Liljana Ruko 43 vjeçe.

Ngjarja në fjalë ka ndodhur në orën 15 e 45 minuta të pasdites së të shtunës në lagjen “Kryengritja e Fierit”.

Komshinjtë kanë dëgjuar zënka, debate me zë të lartë.

Ata thonë se më pas kanë parë momentin kur 52 vjeçari e ka hedhur gruan e tij, nënë e dy fëmijëve, nga dritarja.

Edhe pse janë munduar që ta shpëtojnë, ajo nuk ka mundur të mbijetojë duke ndërruar jetë gjatë rrugës për spital.

Në polici autori i ngjarjes ka pohuar se kishin emigruar një kohë të gjatë në Gjermani dhe kishin pak që ishin kthyer së bashku me 2 fëmijët.

“Edhe në Gjermani i kam pasur këto debate”, ka thënë ai para grupit hetimor që e mori në pyetje.

52-vjeçari e ka pranuar autorësinë e  krimit.

Të hënën pritet që 52 vjeçari Fredi Ruko të dalë para togave të zeza për të marrë masën e sigurisë.