Shqipëria në vendin e 10-të mes 20 destinacioneve kryesore të pushimeve të francezëve këtë verë
Shqipëria renditet në vendin e 10-të mes 20 destinacioneve kryesore të pushimeve të francezëve këtë vit, sipas “Observatorit të pushimeve të francezëve”.
Ambasada e Shqipërisë në Francë ka ndarë në rrjetet sociale raportin e “Observatorit të pushimeve të francezëve”, teksa thekson se “me një rritje veçanërisht mbresëlënëse në korrik 2026, Shqipëria shënoi një rritje prej mbi 288% krahasuar me korrikun 2025.
Një entuziazëm që konfirmon, vit pas viti, atraktivitetin gjithnjë e më të madh të Shqipërisë për publikun francez”.
Artikulli i publikuar nga media franceze “BFM Business”:
-7% për Francën, -20% për Portugalinë, -40% për Shtetet e Bashkuara… Udhëtimet e pushuesve francezë në muajin korrik kanë shënuar një rënie të ndjeshme krahasuar me një vit më parë me përjashtim të Shqipërisë, ku rezervimet janë rritur me +288%.
Sipas raportit të fundit të Observatoire EdV (Entreprises du Voyage) – Orchestra, që monitoron tregun francez të udhëtimeve, numri i udhëtarëve ka rënë me 5,6% krahasuar me korrikun e vitit 2025. Mes situatës në Lindjen e Mesme dhe zjarreve në jugperëndim të Francës, pasiguria e konsumatorëve ka arritur nivelin më të lartë.
Rimëkëmbja nuk pritet të ndodhë. Edhe pse ka pasur një rritje të rezervimeve të minutës së fundit, sektori francez i udhëtimeve vlerëson se vera e vitit 2026 do të jetë dukshëm më e dobët krahasuar me vitin e kaluar. Pothuajse të gjitha destinacionet janë prekur nga kjo rënie, përfshirë edhe Francën.
“Udhëtimet me distancë të mesme po tregojnë më shumë qëndrueshmëri krahasuar me zonat e tjera. Ndërkohë, Franca ka shënuar rënie, ndërsa udhëtimet në distanca të gjata mbeten segmenti më i prekur”, thuhet në raport.
“Pas një muaji qershor, i cili u karakterizua gjithashtu nga një ngadalësim i aktivitetit, tregu konfirmon një rënie të kërkesës në krahasim me vitin 2025. Rritja e parashikuar e rezervimeve të minutës së fundit nuk është vërejtur deri më tani”, thekson raporti.
Shqipëria veçohet me një rritje prej 288% të udhëtimeve krahasuar me një vit më parë.
Për periudhën nga 1 deri më 28 korrik, volumi i rezervimeve për Francën ka rënë me 7,2%. Megjithatë, Franca mbetet “destinacioni kryesor” për pushuesit francezë, ndërsa Spanja vijon të shënojë rritje (+4%) dhe po bëhet gjithnjë e më tërheqëse për turistët. Greqia (-7%), Tunizia (-3%) dhe Italia (-9%) kanë regjistruar rënie më të moderuara, thekson EdV.
“Në kategorinë e udhëtimeve me distancë të mesme, Shqipëria vijon të jetë destinacioni me rritjen më të fortë, duke shënuar një rritje prej 288%. Edhe Maroku vijon të shënojë rritje (+6%). Nga ana tjetër, Turqia (-35%), Portugalia (-21%) dhe Egjipti (-23%) kanë regjistruar rënie të ndjeshme.
Në segmentin e udhëtimeve në distanca të gjata, situata mbetet më e dobët. Shtetet e Bashkuara (-39%) dhe Tanzania (-24%) kanë shënuar rëniet më të mëdha, ndërsa Japonia (+28%), Kanadaja (+2%) dhe Republika Dominikane (+1%) kanë arritur të ruajnë një ecuri pozitive”, thekson Edv.
Edhe gushti nuk pritet të sjellë përmirësim. “Rezervimet vijojnë të jenë nën nivelin e vitit 2025, me rreth 9% më pak udhëtarë. Këtë herë, Franca shënon një rënie të ndjeshme, rreth 12% më pak udhëtarë, ndërkohë që në muajt e mëparshëm kishte arritur të zbusë disi tendencat negative. Ky ngadalësim lidhet veçanërisht me numrin më të ulët të rezervimeve të minutës së fundit gjatë muajit korrik”, thuhet në raport, kryesisht për shkak të zjarreve në jugperëndim të vendit.
“Sa i përket Francës, shpresojmë që udhëtarët të rikthehen sapo situata ta lejojë, në mënyrë që të mbështesin zonat e prekura dhe profesionistët që punojnë atje”, shprehet Valérie Boned, presidente e EdV.
Sipas parashikimeve, deri më tani vetëm Spanja (+3,5%), Maroku (+3%), Shqipëria (+258%), Mali i Zi (+37%) dhe Kanadaja (+3%) kanë shënuar rritje të rezervimeve./atsh
