Lladrovci: Kush shkel Kushtetutën, s’duhet të ketë të drejtë në poste publike apo në Kuvend për pesë mandate

Lidhur me aktualitetin politik, Ramiz Lladrovci përmes një postimi në rrjetin social Facebook ka thënë se “Kushtetuesja duhet të hedhë poshtë çdo mandat të deleguar, nga 7 Gushti e këndej”.

“Të sanksionojë uzurpatorët e posteve dhe përgjegjësive që nuk ju takojnë dhe të marrë përsipër organizimin e zgjedhjeve të reja”.

Postimi i plotë:

Kushdo që shkel Kushtetutën me vetëdije, nuk do të duhej të ketë të drejtë në postet publike e as për Kuvend për pesë mandatet e ardhme

Çfarë po presin deputetë e Kuvendit që urgjent nuk e dërgojnë kërkesën për saktësimin e sanksioneve ndaj të gjithë atyre që e shkaktuan situatën kushtetuese që ndodhet Kosova. Për shkeljen e Kushtetutës, ka fajtorë.

Është shkelur jo vetëm Kushtetuta dhe afati nga vendimi i Kushtetueses, por po cenohet seriozisht rendi kushtetues e demokratik, nuk është ftuar seanca, edhe pse është obligim kushtetues përmbyllja e seancës. Edhe për shkeljen e këtyre afateve ka fajtorë.

Cili ka legjitimitet aktualisht ta ftojë seancën dhe cilat janë sanksionet për atë që nuk e thërret seancën për përmbylljen e Konstituimit të Kuvendit të Republikës së Kosovës.

Për bindjen time, Kushtetuesja duhet të hedhë poshtë çdo mandat të deleguar, nga 7 Gushti e këndej. Të sanksionojë uzurpatorët e posteve dhe përgjegjësive që nuk ju takojnë dhe të marrë përsipër organizimin e zgjedhjeve të reja.

Kushdo që shkel Kushtetutën me vetëdije, nuk do të duhej të ketë të drejtë të kandidojë as në postet publike e as për Kuvendin e Republikës për pesë mandatet e ardhme.

Mjaft me paudhësi, Kosova as qytetarët nuk ua kanë borxh!