Pse kalimi i tepërt i kohës online lidhet me stresin dhe pakënaqësinë?
Një studim i ri sugjeron se kalimi i tepërt i kohës në internet mund të lidhet me më shumë stres, humor të keq dhe vështirësi në përmbushjen e detyrimeve të përditshme.
Studimi, i publikuar në revistën “PLOS One”, përfshiu 900 të rritur në Gjermani. Studiuesit zbuluan se personat që përdorin internetin në mënyrë të tepruar kishin më shumë gjasa të ndiheshin të stresuar, të irrituar dhe të neglizhonin punën, shkollën ose marrëdhëniet personale, shkruan CNN.
Sipas studiuesve, shumë njerëz i drejtohen internetit kur ndihen të stresuar ose të mërzitur, për t’u shpërqendruar ose për t’u qetësuar.
Megjithatë, përdorimi i tepërt mund ta përkeqësojë gjendjen emocionale, duke krijuar një rreth vicioz: sa më shumë stres, aq më shumë kohë online, dhe sa më shumë kohë online, aq më shumë stres, transmeton Gazeta Shneta.Ekspertët theksojnë se përdorimi i tepërt i internetit nuk njihet ende zyrtarisht si çrregullim mendor, por gjithnjë e më shumë studime tregojnë se ai mund të ketë ngjashmëri me sjelljet e varësisë.
Një nga arsyet është se qëndrimi për shumë orë para ekranit shpesh zëvendëson aktivitetin fizik, i cili është i rëndësishëm për shëndetin fizik dhe mendor. Përveç kësaj, kalimi i vazhdueshëm nga mesazhet te rrjetet sociale, email-et dhe aplikacionet e tjera e lodh trurin dhe e bën më të vështirë përqendrimin.
Edhe rrjetet sociale mund të ndikojnë negativisht në humor. Krahasimi i vazhdueshëm me jetën e idealizuar që të tjerët publikojnë në internet mund të krijojë ndjenja pakënaqësie ose inferioriteti.
Sipas studiuesve, edhe pse shumë njerëz e përdorin internetin për t’u çlodhur nga stresi, kjo nuk është gjithmonë zgjidhja më e mirë. Kufizimi i kohës para ekranit mund të krijojë më shumë hapësirë për aktivitete që përmirësojnë mirëqenien, si lëvizja, natyra dhe kontakti i drejtpërdrejtë me njerëzit.
