Uria gjatë natës në shtatzëni: Pse ndodh dhe si ta menaxhoni?

Ndryshimet hormonale dhe rritja e metabolizmit mund të shtojnë oreksin gjatë shtatzënisë. Për këtë arsye, disa gra mund të zgjohen në mes të natës me ndjenjë të fortë urie, edhe nëse kanë ngrënë mjaftueshëm gjatë ditës.

Uria gjatë natës nuk është e pazakontë gjatë shtatzënisë. Ndryshimet hormonale ndikojnë në sinjalet që i tregojnë trupit nëse është i uritur apo i ngopur, ndërsa metabolizmi përshpejtohet për të përmbushur nevojat e fetusit në zhvillim, shkruan burimi Baby Center transmeton Gazeta Shneta.

Është normale që nevojat për energji të rriten gjatë shtatzënisë. Në tremujorin e parë zakonisht nuk nevojiten kalori shtesë, ndërsa në tremujorin e dytë rekomandohen rreth 340 kalori shtesë në ditë dhe rreth 450 në tremujorin e tretë. Këto nevoja mund të ndryshojnë në shtatzënitë me binjakë ose trinjakë.

Për të shmangur zgjimet nga uria, ekspertët rekomandojnë të mos shkoni në shtrat të uritura. Shtimi i ushqimeve të pasura me fibra në darkë, si perimet, frutat, bishtajoret dhe drithërat integrale, mund t’ju mbajë të ngopura për më gjatë.

Nëse zgjoheni të uritura gjatë natës, mund të konsumoni një vakt të lehtë dhe ushqyes, si vezë të ziera, fruta të freskëta ose gjizë. Është më mirë të kufizoni ushqimet shumë të përpunuara dhe me sheqer, pasi ato treten shpejt dhe mund t’ju lënë sërish të uritura.

Edhe hidratimi është i rëndësishëm. Gjatë shtatzënisë nevojiten më shumë lëngje për të mbështetur rritjen e vëllimit të gjakut dhe nevojat e fetusit.

Megjithatë, nëse zgjoheni shpesh për të urinuar, sidomos në muajt e fundit, konsumoni pjesën më të madhe të lëngjeve gjatë ditës.

Gjithashtu, shmangni në darkë ushqimet që mund të shkaktojnë urth ose probleme me tretjen, si ushqimet e yndyrshme dhe të skuqura, agrumet dhe pijet e gazuara. /Gazeta Shneta