“Kosova në prag të humbjes së Lojërave Mesdhetare 2030”, Përparim Rama ia hedh fajin qeverisë “Kurti”

Kryetari i Komunës së Prishtinës, Përparim Rama, e ka bërë një paralajmërim shqetësues sot përmes një postimi në rrjetet sociale.

I pari i kryeqytetit ka shkruar se Kosova është në prag të humbjes së organizimit të Lojërave Mesdhetare 2030.

“Ajo që kemi paralajmëruar vazhdimisht, sot po konfirmohet zyrtarisht nga Komiteti Ndërkombëtar i Lojërave Mesdhetare (ICMG)!”, shkroi fillimisht Rama.

“Sot, ICMG-ja konfirmon mungesën e përgjigjeve institucionale dhe si rrjedhojë më 19 dhjetor do të shqyrtohet situata dhe do të procedohet me thirrjen e një Asambleje të Jashtëzakonshme që do të vendosë për të ardhmen e Lojërave. Kjo është humbja ma e madhe për Kosovën dhe qytetarët e saj!”, shtoi i pari i kryeqytetit, shkruan Express.

“Prishtina i ka fituar Lojërat Mesdhetare 2030, e kemi punuar në Masterplan, i kemi përcaktuar projektet dhe lokacionet, i kemi votuar në Asamblenë e Kryeqytetit. Tash, kur është radha e Qeverisë qendrore dhe Komitetit Organizativ, në krye të të cilit Albin Kurti e ka vendosur vetveten, si asnjë shtet tjetër, Kosova po rrezikon ta humbasë këtë mundësi historike!”, shkruan tutje Rama, duke ia hedhur fajin qeverisë “Kurti”.

Kosova e fitoi të drejtën e organizimit të Lojërave të ardhshme Mesdhetare, por vendi ynë është shumë vonë dhe shumë prapa me infrastrukturë sportive, prandaj edhe rrezikon ta humbasë të drejtën e organizimit të kësaj gare prestigjioze. /Gazeta Express