90 forca morën pjesë në operacionin për gjetjen e trupit të Erkin Likës, duke përfshirë edhe ekipet nga Kosova

Nën drejtimin e prefektit të Qarkut Dibër dhe koordinimin e Agjencisë Kombëtare të Mbrojtjes Civile, u zhvillua operacioni i kërkim-shpëtimit për gjetjen e 35-vjeçarit të zhdukur në lumin Mat, pranë Urës së Vashës, në bashkinë Klos.

Në operacion u angazhuan rreth 90 forca dhe vullnetarë nga strukturat e mbrojtjes civile në nivel qendror dhe vendor, përfshirë efektivë të Forcave të Armatosura të Shqipërisë, Policisë së Shtetit, RENEA-s, polumbarë, zjarrfikës, ekipe kërkim-shpëtimi dhe vullnetarë.

Mbështetje në këtë operacion dhanë edhe ekspertë dhe ekipe kërkim-shpëtimi nga Kosova, të cilët iu bashkuan përpjekjeve për lokalizimin e 35-vjeçarit Erkin Lika, i cili humbi jetën pasi ra në lumin Mat gjatë një ngjitjeje me litar pranë Urës së Vashës.

Pas kërkimeve intensive dhe bashkëpunimit ndërinstitucional, ekipet e angazhuara arritën të gjejnë trupin e pajetë të 35-vjeçarit pranë Urës së Vashës.

Ngjarja kishte ndodhur pasditen e së shtunës, kur Lika ishte duke kryer ngjitje me litar në këtë zonë. Sipas dyshimeve paraprake, ai ka rënë në një gropë thithëse në lumin Mat dhe nuk ka arritur të dalë në sipërfaqe.

Agjencia Kombëtare e Mbrojtjes Civile ka shprehur ngushëllimet më të sinqerta për familjen e viktimës, duke falënderuar të gjitha strukturat, ekspertët dhe vullnetarët e angazhuar për profesionalizmin dhe përkushtimin e treguar gjatë operacionit të kërkim-shpëtimit.