Rasti i Arlinda Zekajt, Ramadani: Komisioni Hetimor do të jetë transparent

Komisioni Hetimor Parlamentar për veprimet dhe mosveprimet institucionale lidhur me vrasjen e Arlinda Zekajt dhe trajtimin e dhunës ndaj fëmijëve dhe grave në familje ka mbajtur sot mbledhjen e radhës, e cila pas një diskutimi nga anëtarët e këtij komisioni, ka vazhduar me dyer të mbyllura.

Kjo mbledhje vjen pas takimit të së premtes, kur u diskutua edhe për mosdorëzimin e raporteve të kërkuara nga Ministria e Drejtësisë dhe Ministria e Punëve të Brendshme.

Kryesuesi i këtij komisioni, Burim Ramadani, ka njoftuar se sot Zyra e Kryeministrit i ka dërguar këtij komisioni raportet e Ministrisë së Drejtësisë dhe Ministrisë së Punëve të Brendshme dhe se kështu ka filluar bashkëpunimi institucional lidhur me veprimet që do të ndërmerren për rastin e Arlinda Zekajt.

Eman Rrahmani nga PDK-ja tha se Zyra e Kryeministrit po tenton t’i mbulojë të metat e institucioneve në mbrojtjen e Arlinda Zekajt.

“Është situata që angazhimi edhe i Zyrës së Kryeministrit në vend që të duhet t’i ndihmojë këtij komisioni që të zbardhim gjithë dështimin e zinxhirit, po bëhet pengesë dhe manipulator i procesit… Unë e shoh se qasja e këtij grupi parlamentar, në përgjithësi, është për t’i mbuluar të metat dhe për të mos zbardhur dështimin e zinxhirit të shtetit për mbrojtjen jetën e një gruaje”, tha ai.

Kryesuesi i komisionit Burim Ramadani u zotua para mediave se gjithçka do të jetë transparente.

“Kemi pasur qëndrime të kundërta, nuk jemi pajtuar, kemi dalë secili kemi folur dhe është ajo pjesë që nuk e fsheh askush”, tha Ramadani.

Mbledhja e Komisionit u vendos të vazhdojë pa praninë e mediave. Në rend dite janë plotësim-ndryshimi i Planit të Punës dhe kalendarit të aktiviteteve, hartimi preliminar i listës së dokumenteve që do t’u kërkohen institucioneve relevante, si dhe miratimi i buxhetit të Komisionit.

Komisioni Hetimor Parlamentar është themeluar më 29 tetor nga Kuvendi i Kosovës dhe ka mandat maksimal prej gjashtë muajsh. Ai do të hetojë veprimet dhe mosveprimet institucionale lidhur me rastin e Arlinda Zekajt, e cila u vra më 25 tetor në Vitomiricë të Pejës, si dhe për të shqyrtuar trajtimin institucional të dhunës në familje. /teve1.info