Trumpi konfirmon mbështetjen për Pete Hegseth: Kam çdo qëllim ta mbaj në detyrë
Presidenti amerikan Donald Trump ka shprehur mbështetjen e tij për Sekretarin e Luftës, Pete Hegseth, duke deklaruar se nuk ka ndërmend ta largojë nga detyra, pavarësisht raportimeve se administrata po shqyrton mundësinë e zëvendësimit të tij.
Gazetari i ABC News, Jon Karl, bëri të ditur të enjten se kishte kontaktuar drejtpërdrejt me presidentin Trump, i cili i kishte deklaruar: “Kam çdo qëllim ta mbaj atë”.
Trump u shpreh gjithashtu i habitur nga telefonatat dhe presioni që po merr lidhur me të ardhmen politike të Hegseth. “Po marr këto telefonata, e dini, për të. Nuk e kuptoj pse”, citohet të ketë thënë presidenti amerikan.
Deklaratat e Trump vijnë pas një raportimi të CBS News, sipas të cilit presidenti kishte nisur të konsultohej me këshilltarët e tij për mundësinë që Hegseth të largohej nga posti i Sekretarit të Luftës.
Ndërkohë, zhvillimet politike vijnë në një moment të vështirë për republikanët, pas humbjeve të tyre në zgjedhjet e mesmandatit. Zëvendëspresidenti amerikan, J.D. Vance, ka lidhur publikisht rezultatet negative të partisë me luftën me Iranin dhe pasojat e përfshirjes ushtarake amerikane.
Pavarësisht spekulimeve dhe presionit politik, deklarata e fundit e Trump duket se konfirmon se, të paktën për momentin, ai synon ta mbajë Pete Hegseth në krye të Pentagonit.
