Gjykata Ndërkombëtare e Drejtësisë konstaton se Mianmari kreu gjenocid ndaj Rohingya-ve
Gjykata Ndërkombëtare e Drejtësisë (GJND) ka konstatuar se ushtria e Mianmarit ka kryer gjenocid ndaj pakicës myslimane Rohingya gjatë fushatës ushtarake të vitit 2017. Ky është rasti i parë në të cilin një shtet shpallet përgjegjës për gjenocid nga kjo gjykatë, organi më i lartë gjyqësor i Kombeve të Bashkuara.
Vendimi historik vjen pas një procesi gjyqësor shtatëvjeçar dhe pritet të ketë pasoja përtej Mianmarit, përfshirë edhe rastet e tjera të gjenocidit që po shqyrtohen në nivel ndërkombëtar.
Sipas vendimit, veprimet e ushtrisë së Mianmarit ndaj komunitetit Rohingya, përfshirë vrasjen e mijëra njerëzve, djegien e qindra fshatrave dhe dhunën seksuale në shkallë të gjerë, përbëjnë gjenocid. Gjykata ka urdhëruar Mianmarin të mundësojë kthimin e sigurt të refugjatëve dhe të ofrojë reparacione për viktimat, raporton skynews.
Sekretari i Përgjithshëm i OKB-së, António Guterres, e ka cilësuar vendimin si të formës së prerë dhe ligjërisht të detyrueshëm, duke theksuar se Mianmari ka obligim të hetojë dhe të ndjekë penalisht përgjegjësit për krimet. Megjithatë, GJND-ja nuk ka mekanizëm të drejtpërdrejtë për ta zbatuar vendimin dhe mund ta raportojë mospërputhjen me të në Këshillin e Sigurimit të OKB-së.
Vendimi është mirëpritur nga organizatat ndërkombëtare për të drejtat e njeriut. Amnesty International e ka cilësuar atë si një moment historik për drejtësinë dhe njohjen e vuajtjeve të komunitetit Rohingya, ndërsa Human Rights Watch ka kërkuar që Mianmari ta zbatojë pa vonesa aktgjykimin.
Pas vendimit, Britania e Madhe ka thirrur në Ministrinë e Jashtme të ngarkuarin me punë të ambasadës së Mianmarit në Londër, Win Zeya Tun, ndërsa ka vendosur ta dëbojë atasheun ushtarak të këtij shteti. Ministri i Jashtëm britanik, Ed Miliband, ka thënë se vendi i tij është i vendosur të veprojë për të siguruar përgjegjësi për krimet e kryera.
Fushata ushtarake e vitit 2017 detyroi më shumë se 700 mijë Rohingya të largoheshin drejt Bangladeshit. Shumë prej tyre vazhdojnë të jetojnë në kampe refugjatësh, ndërsa kthimi në Mianmar mbetet i pasigurt për shkak të konfliktit të vazhdueshëm dhe mungesës së garancive për të drejtat e tyre.
Vendimi pritet të ndiqet me vëmendje edhe për shkak të ndikimit të mundshëm në raste të tjera para GJND-së, përfshirë padinë e Afrikës së Jugut kundër Izraelit për pretendimet për gjenocid në Gaza. Izraeli i mohon këto akuza.