VAR-i e shpjegon anulimin e golit të Lo Celso ndaj Barcelonës
Goli spektakolar i Giovani Lo Celso ndaj Barcelonës u anulua pas ndërhyrjes së VAR-it, duke shkaktuar polemika në ndeshjen mes Betisit dhe katalunasve, e cila përfundoi me fitoren e Barcelonës me rezultat 5-2.
Në minutën e 43-të, mesfushori argjentinas shënoi një gol të bukur me volej, duke e dërguar topin në këndin e portës së Joan Garcias.
Me këtë gol, Betisi do ta barazonte rezultatin në 2-2, por festimi i vendasve u ndërpre pas rishikimit të aksionit nga gjyqtari kryesor, Ricardo de Burgos Bengoetxea.
Prekja me dorë e Cucho Hernandezit
Gjithçka nisi nga një duel mes sulmuesit të Betisit, Cucho Hernandez, dhe mbrojtësit të Barcelonës, Gerard Martin.
Gjatë kontrollit të topit, sulmuesi vendas e preku atë me dorën e majtë për ta orientuar në favor të tij.
Aksioni vazhdoi dhe Jules Kounde ndërhyri për ta larguar topin, por pa arritur ta merrte nën kontroll. Betisi e rifitoi sërish topin dhe, pas zhvillimit të aksionit, Lo Celso realizoi golin që u anulua më pas.
Dialogu mes VAR-it dhe gjyqtarit
Pas rishikimit të pamjeve, VAR-i, i drejtuar nga Carlos del Cerro Grande, i shpjegoi gjyqtarit se prekja me dorë duhej vlerësuar si pjesë e së njëjtës fazë sulmuese.
“Ricardo, të rekomandoj një rishikim për një prekje të mundshme me dorë në fazën e sulmit”, ishte mesazhi fillestar nga dhoma e VAR-it.
Më pas, gjyqtari u udhëzua të shikonte pamjet nga kënde të ndryshme për të vlerësuar veprimin e Cucho Hernandezit.
Pas shqyrtimit, De Burgos Bengoetxea dha vlerësimin e tij: “Për mua, prekja me dorë është e ndëshkueshme”.
Gjyqtari kërkoi që aksioni të rishikohej nga fillimi, për të përcaktuar nëse bëhej fjalë për të njëjtën fazë sulmuese.
“Për mua, është e njëjta fazë sulmi, sepse Barcelona në asnjë moment nuk e merr kontrollin e topit. E anuloj golin dhe e rifilloj lojën me goditje të lirë direkte në favor të Barcelonës”, shpjegoi ai.
Kështu, gjyqtari vendosi që prekja me dorë e Cucho Hernandezit ishte pjesë e drejtpërdrejtë e aksionit që përfundoi me golin e Lo Celso.
Vendimi shkaktoi pakënaqësi te futbollistët dhe tifozët e Betisit, të cilët pretendonin se aksioni kishte vazhduar për disa sekonda dhe se Barcelona kishte pasur mundësi të ndërhynte para realizimit të golit.
Megjithatë, sipas interpretimit të VAR-it, ndërhyrja e Koundes nuk përbënte marrje të kontrollit të topit nga Barcelona, ndaj faza sulmuese e Betisit konsiderohej ende e njëjta.
Ndeshja përfundoi 5-2 në favor të Barcelonës, e cila regjistroi fitoren e nëntë radhazi në La Liga. /Zëri
