Gjiganti evropian hyn në garë për Botërorin 2038

Franca po shqyrton mundësinë e organizimit të Kampionatit Botëror të Futbollit në vitin 2038.

Presidenti i Federatës Franceze të Futbollit, Philippe Diallo, ka konfirmuar interesimin për një kandidaturë të mundshme, duke theksuar se organizimi i një turneu të përmasave të tilla mund të kërkojë bashkëpunimin me shtete të tjera.

Sipas raportimeve të fundit, Franca po shqyrton mundësinë e një kandidature të përbashkët me Gjermaninë, ndërsa nuk përjashtohet përfshirja edhe e një shteti të tretë.

Rritja e numrit të pjesëmarrësve në Kupën e Botës në 48 kombëtare ka shtuar kërkesat për infrastrukturë, stadiume dhe organizim.

Për këtë arsye, bashkëpunimi mes disa shteteve mund të jetë një zgjidhje për të përmbushur kriteret e FIFA-s.

Diallo: Duhet të bashkohemi me shtete të tjera

Kreu i futbollit francez ka bërë të qartë se organizimi i një Botërori kërkon kapacitete të mëdha dhe se Franca duhet të shqyrtojë mundësinë e bashkëpunimit me vende të tjera.

Një kandidaturë e përbashkët do të mundësonte ndarjen e ndeshjeve mes disa shteteve dhe shfrytëzimin e infrastrukturës ekzistuese.

Franca e ka organizuar për herë të fundit Botërorin për meshkuj në vitin 1998, kur edhe e fitoi trofeun në shtëpi, pas triumfit 3-0 ndaj Brazilit në finalen e zhvilluar në Paris.

Megjithatë, një kandidaturë për vitin 2038 nuk është zyrtarizuar ende. Federata Franceze duhet të qartësojë planet e saj dhe të identifikojë partnerët e mundshëm përpara se të ndërmarrë hapa konkretë.

Gjermania, partneri i mundshëm i Francës

Gjermania është përmendur si një nga partnerët më të mundshëm të Francës në këtë projekt.

Edhe drejtues të futbollit gjerman kanë shprehur interesimin për organizimin e një Botërori, duke përmendur si mundësi vitet 2038 dhe 2042.

Gjermanët e kanë organizuar për herë të fundit Kampionatin Botëror në vitin 2006, ndërsa Franca ishte nikoqire në vitin 1998.

Megjithatë, rruga drejt Botërorit 2038 mund të jetë e ndërlikuar. Sipas parimit të rotacionit kontinental të FIFA-s, organizimi i turneut në vitin 2030 nga vende të Evropës, Afrikës dhe Amerikës së Jugut, e më pas në Arabinë Saudite në vitin 2034, mund t'ua vështirësojë mundësinë evropianëve për të organizuar edicionin e vitit 2038.

Në këtë situatë, Shtetet e Bashkuara dhe vende të tjera jashtë Evropës mund të kenë avantazh.

Për këtë arsye, Franca dhe Gjermania mund të detyrohen ta shqyrtojnë edhe mundësinë e kandidimit për Botërorin e vitit 2042.

Për momentin, gjithçka mbetet në fazën e diskutimeve dhe asnjë kandidaturë zyrtare për Botërorin 2038 nuk është paraqitur. /Zëri