Kurti përuron rehabilitimin e kanalit të Ibër-Lepencit: Investim 18-milionësh për sigurinë ujore dhe energjetike të Kosovës

Në Zubin-Potok është përuruar rehabilitimi i një pjese të kanalit të Ibër-Lepencit, një projekt prej 18 milionë eurosh që synon forcimin e sigurisë ujore dhe mbrojtjen e një prej infrastrukturave më të rëndësishme të Kosovës.

Në ceremoninë e inaugurimit morën pjesë kryeministri në detyrë, Albin Kurti, ministrja në detyrë e Ekonomisë, Artane Rizvanolli, ministri në detyrë për Komunitete dhe Kthim, Nenad Rashiq, si dhe drejtori i ndërmarrjes Ibër-Lepenc, Faruk Mujka.

Kurti tha se projekti përfaqëson një investim strategjik për mbrojtjen e kanalit, i cili, sipas tij, është infrastrukturë jetike për vendin.

"Mbrojtja e tij nuk është thjesht një çështje lokale dhe as vetëm teknike; është mbrojtje e përditshme e Republikës, e dritës në shtëpi, e ujit nga rubineti, e prodhimit në ekonomi dhe e bukës nga ara", tha ai.

Sipas Kurtit, me investimin prej 18 milionë eurosh janë rehabilituar 37 segmente përgjatë 49 kilometrave të kanalit, ndërsa është ndërtuar edhe një rezervuar kompensues me kapacitet prej 30 mijë metrash kub, që do të shërbejë për furnizim emergjent të termocentraleve dhe ujësjellësve në raste të jashtëzakonshme.

Ministrja Rizvanolli e cilësoi projektin si të domosdoshëm për sigurinë ujore të Kosovës, duke rikujtuar sulmin ndaj kanalit të Ibër-Lepencit vitin e kaluar.

"Ky rast na bëri ta kuptojmë edhe më mirë se Ujmani është jetik për sigurinë e vendit tonë dhe për furnizimin me ujë të rreth 500 mijë banorëve të Republikës së Kosovës", deklaroi ajo.

Ajo shtoi se projekti ka arritur tri rezultate kryesore: rehabilitimin e kanalit dhe rikthimin e kapacitetit fillestar, përmirësimin e cilësisë së ujit dhe modernizimin e monitorimit e menaxhimit të infrastrukturës.

Ndërkaq, Rashiq vlerësoi bashkëpunimin institucional, duke thënë se projekte të tilla ndikojnë në ndryshimin e qasjes ndaj banorëve të veriut të Kosovës.

Edhe drejtori i Ibër-Lepencit, Faruk Mujka, theksoi se investimi nuk është vetëm në infrastrukturë, por edhe në sigurinë kombëtare dhe ekonominë e vendit.

Sipas tij, projekti garanton furnizim më të qëndrueshëm me ujë për rreth 500 mijë banorë në nëntë komuna të Kosovës, si dhe për nevojat e Korporatës Energjetike të Kosovës (KEK).